இப்போதைக்கு பள்ளிகள் திறக்கப்படாது - அமைச்சர் செங்கோட்டையன்.

 கொரோனா பரவல் காரணமாக கடந்த ஆண்டு மார்ச் மாதம் நாடு முழுவதும் பள்ளி, கல்லூரிகள் உள்ளிட்ட அனைத்து கல்வி நிறுவனங்கள் மூடப்பட்டன.. தேர்வு நடத்த முடியாத நிலை ஏற்பட்டதால், பல மாநிலங்கள் மாணவர்கள் தேர்ச்சி பெற்றதாக அறிவித்தன. அந்த வகையில் தமிழகத்திலும் 1 முதல் 9 வகுப்பு வரை மாணவர்களுக்கு, தேர்வு நடத்தாமலேயே, ஆல் பாஸ் வழங்கப்பட்டது.

கடந்த 10 மாதங்களாக பள்ளிகள் திறக்கப்படாத நிலையில், ஆன்லைன் மூலமாக வகுப்புகள் நடத்தப்பட்டு வந்தது.

இந்த சூழலில் 10 மற்றும் 12 வகுப்பு மாணவர்களுக்கு மட்டும் ஜனவரி 19-ம் தேதி முதல் பள்ளிகள் திறக்கப்பட்டுள்ளன. மேலும் 9 மற்றும் 11-ம் வகுப்பு மாணவர்களுக்கு நேற்று முன் தினம் முதல் பள்ளிகள் திறக்கப்பட்டுள்ளன.. இதே போல் தமிழகத்தில் உள்ள கல்லூரிகளும் அனைத்து வகை இளநிலை, முதுநிலை பட்டப்படிப்புகள், டிப்ளமோ படிப்புகள் ஆகியவற்றுக்கான வகுப்புகளும் தொடங்கப்பட்டுள்ளன.

இந்நிலையில் 6,7,8-ம் வகுப்பு மாணவர்களுக்கும் விரைவில் பள்ளிகளை திறக்க அரசு முடிவெடுத்துள்ளதாக தகவல் வெளியாகி உள்ளது. மேலும் 6,7,8 வகுப்புகளுக்கான குறைக்கப்பட்ட பாடத்திட்டங்களை பள்ளிக்கல்வித்துறை வெளியிட்டுள்ளது. எற்கனவே பாடத்திட்டங்கள் குறைக்கப்பட்ட பின்பு தான், 9 முதல் 12 வகுப்பு வரை படிக்கும் மாணவர்களுக்கு பள்ளிகள் திறக்கப்பட்டன. எனவே விரைவில் 6 முதல் 8-ம் வகுப்பு மாணவர்களுக்கும் பள்ளிகள் திறக்கப்படலாம் என்று கூறப்பட்டது.

ஆனால் 6,7,8 வகுப்பு மாணவர்களுக்கு இப்போதைக்கு பள்ளிகள் திறக்கப்பட வாய்ப்பில்லை என்று பள்ளிக்கல்வி துறை அமைச்சர் செங்கோட்டையன் தெரிவித்துள்ளார். இன்று செய்தியாளர்களிடம் பேசிய அவர் இந்த தகவலை வெளியிட்டார். மேலும் 6 முதல் 8 வகுப்பு வரை படிக்கும் மாணவர்களுக்கு டேப் வழங்கப்படும் எனவும் அவர் கூறினார். மேலும் 9 முதல் 12 வகுப்பு மாணவர்கள் 98.5% பள்ளிக்கு வருகை தருகின்றனர் என்றும் தெரிவித்தார்.